【名家給力場】福建中釀入股曠逸走漏風聲？

【Now財經台】毫子股曠逸國際(01683)股價今日(2日)逆市大升，一度高見0.75元，大升近12%。集團上周四(5月29日)及上周五(5月30日)都有消息，分別係向福建中釀買資產及租用物業，集團會發股支付交易，福建中釀變相入主，同埋折讓逾10%配股集資，股價今日先有反應。值得留意係，曠逸2022年開始年年蝕錢，業績同財務都冇乜表現，但股價喺4月初發力，由0.15元水平升至早前最高0.77元，係咪福建中釀入股早已洩漏咗，「春江鴨」就出動？

《香港股票財技密碼》作者梁杰文指，曠逸股價升應該同配股消息有關，連續宣布兩單deal惹嚟市場關注。佢又話，未必係「春江鴨」，有可能係內部人士或高手sense到公司做嘢，所以半年前已部署撈底，加上曠逸係一隻殼股，就炒起咗股價，集團上一次易主係2018年，股價曾高見3元，但易主後業務走下坡兼遇上股災，淪為毫子股，亦曾經合股及供股，但近年莊家及市場感受到港股投資氣氛逆轉，公司開始有部署，吸引資金撈底推高股價，再宣布福建中釀入股，當中可能真係有「春江鴨」成分，因為收購唔會係短時間內落實，可能已做咗幾個月盡職審查，可能保密功夫做得唔好，令消息走漏咗，吸引有心人喺低位買貨。