【財經TOP SEARCH】新世界11 Skies吸金力有限？

【Now財經台】截至早上11時止，過去1小時內《彭博》用戶搜尋量最多港股，依次為新世界發展(00017)、長和(00001)、龍湖集團(00960)、比亞迪股份(01211)及康寧傑瑞製藥(09966)。

新世界之前公布4隻永續債要延遲派息，今日(3日)又有消息指，位於香港國際機場嘅11 Skies出租率只得40%，租戶進駐進度緩慢，航空公司亦唔願意將航班轉至鄰近商場嘅2號客運大樓(T2)，但有消息指，商埸計劃明年下半年分階段開幕，依家出租率只得40%係咪唔使太擔心？

富途證券首席分析師譚智樂指，市場始終最關注新世界嘅永續債及股息，對集團新項目關注度唔高，如果11 Skies真係計劃明年下半年分階段開幕，依家出租率只得40%問題唔算大，但值得留意係，商場未必可以成為現金流來源，對零售市場嚟講，即使新世界處於復甦階段，都只係呈「L」型，所以相信11 Skies幫唔到新世界還債之餘，亦吸引唔到現金流。

Arnold又指，由於新世界嘅流動性仍然穩定，所以銀行仲肯借錢畀公司，不過，永續債投資者要留意，新世界嘅股息率及還債息能力，仍存在好大變數，一般投資者亦要留意，現階段唔止睇基本因素，亦涉及好多財務開支等。